ملک میں پٹرول بحران پیدا ہونے کا خدشہ پیدا ہو گیا
ملک میں پٹرول بحران پیدا ہونے کا خدشہ پیدا ہو گیا
پٹرولیم مصنوعات کی قیمتوں کا اعلان نہ ہونے پر پٹرول پمپس نے خریداری روک دی
اسلام آباد( 16ستمبر 2022) ملک میں پٹرول بحران پیدا ہونے کا خدشہ پیدا ہو گیا۔ جیو نیوز کی رپورٹ کے مطابق وفاقی حکومت کی جانب سے گزشتہ روز پٹرولیم مصنوعات کی نئی قیمتوں کا اعلان نہ کیے جانے پر تنازعہ کھڑا ہو گیا۔ جیو نیوز کی رپورٹ کے مطابق پٹرولیم مصنوعات کی نئی قیمتوں کا اعلان نہ ہونے پر پیٹرول پمپس نےخریداری روک لی ہے ۔ذرائع کے مطاباق پٹرول سستا ہونے کے امکان کے باعث پٹرول پمپس کمپنیوں سے پیٹرول نہیں خرید رہے۔ واضح رہے کہ پٹرولیم مصنوعات کی نئی قیمتوں کا اعلان تاخیر کا شکار ہے۔ ذرائع کے مطابق پٹرولیم مصنوعات کی قیمتوں کے تعین کا معاملہ شنگھائی تعاون تنظیم کے اجلاس کے لیے ازبکستان کے شہر سمر قند میں موجود وزیر اعظم کے پاس ہے۔ذرائع کا کہنا ہے کہ وزارت خزانہ پیٹرولیم مصنوعات کی قیمتوں سے متعلق وزیر اعظم کے احکامات کی منتظر ہے۔ذرائع کے مطابق وزیر عظم کی طرف سے منظوری کے بعد پیٹرولیم مصنوعات کی قیمتوں کے حوالے سے کوئی فیصلہ ہو سکے گا۔واضح رہے کہ ملک میں پیٹرولیم مصنوعات کی قیمتیں کم ہونے کا امکان ہے۔ذرائع کے مطابق پیٹرول کی قیمت 9.62 روپے کم ہوکر 235.98 روپے سے 226 روپے تک ہو سکتی ہے جبکہ ڈیزل کی قیمت 3.04روپے اضافے کے بعد 247.26 سے بڑھ کر 250.30 روپے ہو سکتی ہے۔ انڈسٹریل ذرائع کے مطابق یکم ستمبر سے ڈیزل کی قیمت 15فیصد بڑھی ہے، ایکسچینج ریٹ میں بھی اضافہ دیکھا گیا ہے جو 217.81 سے بڑھ کر 225.63روپے ہوا ہے جبکہ ہائی اسپیڈ ڈیزل پر کسٹم ڈیوٹی میں 18.74 روپے کا اضافہ ہوا ہے۔
