لانگ مارچ کی تیاریاں، عمران خان نے ملاقاتیں شروع کر دیں
لانگ مارچ کی تیاریاں، عمران خان نے ملاقاتیں شروع کر دیں
چئیرمین پی ٹی آئی عمران خان نے احتجاج کی کال سمیت پارٹی امور پر مشاورت شروع کر دی، خیبرپختونخوا میں ایم این ایز، ایم پی ایز اور پارٹی عہدیداروں سے ملاقاتیں
پشاور (16 ستمبر2022ء) سابق وزیراعظم عمران خان نے لانگ مارچ کی تیاریوں کے حوالے سے ملاقاتیں شروع کر دیں۔ پاکستان تحریک انصاف نے احتجاج کی کال سمیت پارٹی امور پر مشاورت شروع کر دی۔چئیرمین پی ٹی آئی عمران خان کی زیر صدارت پی ٹی آئی خیبرپختونخوا کی قیادت کا اجلاس اسلام آباد میں ہوا۔اجلاس میں پی ٹی آئی کے رہنما اسد عمر، پرویز خٹک اور علی امین گنڈا پور سمیت وزیراعلیٰ خیبرپختونخوا محمود خان بھی شریک ہوئے۔
خیبرپختونخوا سے اراکین قومی و صوبائی اسمبلی، سینیٹ اور تحصیل ناظمین و ٹکٹ ہولڈرز بھی شریک ہیں۔اجلاس میں احتجاج کی کال سمیت پارٹی امور پر مشاورت کی گئی۔وزیر اعلٰی خیبر پختونخوا محمود خان کا کہنا ہے کہ مسلم لیگ ن والے بوکھلاہٹ کا شکار ہیں اور عدالتوں پر حملہ مسلم لیگ ن کا خاصہ ہے۔وزیر اعلیٰ خیبر پختونخوا محمود خان نے میڈیا سے گفتگو کرتے ہوئے کہا کہ مسلم لیگ ن کی نائب صدر مریم نواز کا جھوٹ پوری قوم دیکھ چکی ہے اور مریم نواز کو پتہ نہیں کہ ان کا دادا غریب گھرانے سے تھا یا ارب پتی سرمایہ کار تھے۔انکا کہنا تھا کہ بھکاریوں کے اس ٹولے کو قوم مزید برداشت نہیں کرے گی۔تعصب سے بھری جماعت کو حکومت کرنے کا کوئی حق نہیں ہے اور بھکاریوں کے اس ٹولے کو قوم مزید برداشت نہیں کرے گی۔عدالتوں سے مفرور لوگ قوم کو مزید گمراہ نہیں کر سکتے۔ انہوں نے کہا کہ عمران خان واحد لیڈر ہیں جنہوں نے اقوام متحدہ میں دین اسلام سے متعلق خطاب کیا اور مذہب کے نام پر سیاست کرنے والوں کو قوم معاف نہیں کرے گی۔
